„Í raun og veru er veiran, vísindalega séð, ekki lengur til staðar á Ítalíu.“ Þetta fullyrðir Alberto Zangrillo, yfirlæknir á San Raffaele-spítalanum í Mílanó.
Vísindamenn, heilbrigðisyfirvöld og Alþjóðaheilbrigðismálastofnunin (WHO) keppast nú við að koma í veg fyrir að fullyrðing læknisins nái útbreiðslu.
Zangrillo, sem er einkalæknir Silvio Berlusconi fyrrverandi forsætisráðherra Ítalíu, ræddi kórónuveirufaraldurinn í sjónvarpsviðtali í gær þar sem sagði meðal annars að sýnin sem tekin hafa verið síðustu tíu daga sýna fram á agnarsmáan styrk kórónuveirunnar, samanborið við sýni sem tekin voru fyrir einum eða tveimur mánuðum. „Einhver þarf að axla ábyrgð á að hafa skelft þjóðina,“ sagði hann jafnframt.
Zangrillo býr og starfar í Mílanó, höfuðborg Langbarðalands, þar sem kórónuveirufaraldurinn hefur verið hvað skæðastur. Rúmlega 33 þúsund hafa látið lífið á Ítalíu sökum veirunnar, þar af rúmlega helmingur í Langbarðalandi.
Sérfræðingar úr ýmsum áttum voru fljótir að bregðast við ummælum Zangrillo. Dr. Oscar MacLean, prófessor í faraldsfræði við Háskólann í Glasgow, segir fullyrðingu Zangrillo ekki byggða á vísindalegum gögnum. Martin Hibber, breskur prófessor, bendir á að nú sé einmitt tíminn til að fylgjast með þeim sem sýna vægari einkenni þar sem veiran gæti verið að breytast.
WHO brást við með yfirlýsingu þess efnis að kórónuveiran og COVID-19, sjúkdómurinn sem veiran veldur, sé ekki orðin vægari. „Við þurfum að fara varlega, þetta er enn banvæn veira,“ segir Michael Ryan, yfirmaður bráðadeildar WHO.
Hann segir það mikilvægt að fólk þrói ekki með sér það viðhorf, nú þegar faraldurinn er víða í rénun, að veiran sé minna smitandi og að hún sé orðin vægari á einhvern hátt. „Sú er alls ekki raunin.“