Hæstiréttur Bandaríkjanna úrskurðaði í dag að það færi gegn alríkislögum um mannréttindi að reka fólk úr starfi vegna kynhneigðar.
Sex dómarar voru fylgjandi úrskurðinum og þrír á móti, en íhaldssamir dómarar eru nú í meirihluta innan dómstólsins.
Samkvæmt úrskurðinum nær 7. grein mannréttindalaga frá árinu 1964, sem bannar mismunum á vinnumarkaði á grundvelli kynferðis, einnig yfir kynhneigð, þvert á fullyrðingar Bandaríkjastjórnar.
Úrskurðurinn er stór sigur fyrir hinsegin samfélagið í Bandaríkjunum eftir því sem fram kemur á BBC.
Þingmenn demókrata og mannréttindafrömuðir hafa fagnað úrskurðinum á samfélagsmiðlum í dag.
Úrskurðurinn bindur enda á þrjú aðskilin mál þar sem fyrrverandi starfsmenn kærðu vinnuveitendur sína fyrir brottvikningu úr starfi í kjölfar þess að vinnuveitendurnir komust að því að umræddir starfsmenn væru samkynhneigðir eða transfólk.