Kórónuveiran aftur komin til Nýja-Sjálands

Tvö ný kórónuveirusmit hafa greinst á Nýja-Sjálandi og eru það fyrstu smitin sem greinast í 24 daga. Fyrir rúmlega viku var því lýst yfir að ekkert virkt smit væri í landinu og það laust við veiruna.

Smitin greindust í tveimur konum úr sömu fjölskyldunni en þær höfðu fengið sérstakt leyfi til að ferðast til Nýja-Sjálands frá Bretlandi til að vera viðstaddar útför foreldris þeirra. BBC greinir frá.

Þjóðerni þeirra er ekki vitað eins og er en þær flugu frá Bretlandi til Doha í Katar og þaðan til Brisbane áður en þær lentu á Nýja-Sjálandi 7. júní. Þær voru í sóttkví á hóteli eftir komuna en fengu að heimsækja foreldri sitt 12. júní, sem lést síðar um kvöldið.  

Öllum hömlum og takmörkunum til að koma í veg fyrir útbreiðslu veirunnar var aflétt á Nýja-Sjálandi í 7. júní. Mikið eftirlit hefur þó verið við landamæri þar sem einungis innfæddir og framlínustarfsmenn hafa fengið inngöngu fyrir utan þá einstaklinga sem fá sérstakar undanþágur.

Frétt af mbl.is

Ekkert virkt smit á Nýja-Sjálandi

Hefðu farið í sýnatöku

Önnur konan var með væg einkenni en taldi þau vera vegna undirliggjandi sjúkdóms. Þær fóru í sýnatöku í gær og niðurstaðan var jákvæð. Hefðu þær lent á Nýja-Sjálandi degi síðar þá hefðu þær farið í skimun á landamærum sem hófst 8. júní

Nýja-Sjáland hefur náð undaverðum árangri í baráttunni við faraldurinn en landið lokaði landamærum sínum mjög fljótlega og þar var útgöngubann sett á. Nú óttast sumir þar í landi, eins og hér, að verið sé að bjóða hættunni heim með því að opna landamærin.

Alls hafa 1.506 smit greinst þar í landi og 22 hafa látið lífið úr COVID-19.

• Blogga um frétt