Spænsk stjórnvöld hafa aflétt stigi neyðarástands vegna kórónuveirufaraldurs og opnað landamæri sín fyrir ferðamönnum frá flestum ríkjum Evrópu.
Strangt útgöngubann hefur verið í gildi á Spáni síðustu þrjá mánuði. Rúmlega 28.320 manns hafa látist af völdum veirunnar á Spáni.
Pedro Sánchez, forsætisráðherra Spánar, sagði í ávarpi vegna opnunarinnar að áfram þyrfti að huga að almennu hreinlæti.
Alla jafna fara um 80 milljónir ferðamanna til Spánar á ári hverju og ferðaiðnaðurinn skapar um 12% af vergri landsframleiðslu. Opnun landamæra fyrir ferðamönnum hefur því gríðarlega þýðingu fyrir spænsk efnahagskerfi eftir því sem fram kemur á BBC.
Við komuna til Spánar verða ferðamenn hitamældir og þurfa þeir að láta í té tengiliðaupplýsingar.
Fjarlægðartakmarkanir verða enn í gildi og áfram þarf að gæta að 1,5 metra fjarlægðar, vera með andlitsgrímur á almannafæri og þvo hendur reglulega.
Landamæri Spánar við Portúgal verða áfram lokuð til 1. júlí að beiðni portúgalskra yfirvalda.