Tíu menn dæmdir fyrir hópnauðgun

Tíu karlmenn voru í dag fundnir sekir um hópnauðgun fyrir utan skemmtistað í þýsku borginni Freiburg árið 2018. Árásin vakti mikla athygli og varð kveikja að mótmælum og bylgju útlendingahaturs í landinu en átta af 11 ákærðum í málinu eru flóttamenn frá Sýrlandi.

Sá sem var talinn höfuðpaurinn í málinu fékk fimm og hálfs árs fangelsisdóm fyrir nauðgunina, sem stóð yfir í meira en tvær klukkustundir. Aðrir voru dæmir í þriggja til fjögurra ára fangelsi og einn var sýknaður.

Stúlkunni sem var nauðgað var byrlað ólyfjan áður en ráðist var á hana í gróðri fyrir utan skemmtistaðinn. Hún var 18 ára gömul þegar árásin átti sér stað.

Átta af þeim 11 sem voru ákærðir í málinu voru flóttamenn frá Sýrlandi og þótti mörgum, sér í lagi stuðningsmönnum stjórnmálaflokksins AfD, það bera vott um misheppnaða stefnu Angelu Merkel, kanslara Þýskalands, í útlendingamálum. Aðrir gerendur voru frá Írak, Afganistan og Þýskalandi.

Sama ár og árásin átti sér stað var flóttamaður frá Afganistan dæmdur í lífstíðarfangelsi fyrir að nauðga og myrða konu í sömu borg, Freiburg. Martin Horn, borgarstjóri Freiburg, sagði hópnauðgunina hafa gert íbúa skelfingu lostna en hrósaði meirihluta borgarbúa fyrir að dæma ekki alla flóttamenn fyrir gjörðir nokkurra.

Frétt af mbl.is

Hælisleitandi í lífstíðarfangelsi

Hinir ákærðu hylja andlit sín. AFP

• Blogga um frétt