Til stendur að gera grímunotkun að skyldu á flestum vinnustöðum í Frakklandi frá og með 1. september til að reyna að hefta úrbreiðslu kórónuveirunnar þar í landi.
Samkvæmt frétt BBC munu reglurnar líklega ná til allra sameiginlegra rýma franskra vinnustaða þar sem fleiri en einn er viðstaddur. Einstaklingsskrifstofur verði undanskildar.
Tilfellum kórónuveirunnar hefur fjölgað í Frakklandi frá júlí, en þar er þegar víðtæk grímuskylda.
Meðaltal nýrra smita daglega undanfarna sjö daga er vel yfir 2.000, eða tvöfalt hærra en það var í byrjun ágúst.
Heilbrigðisyfirvöld í Frakklandi telja að nærri fjórðung allra nýrra hópsýkinga megi rekja til vinnustaða.
Alls hafa 220 þúsund Frakkar smitast af kórónuveirunni og 30 þúsund látist.