Eitrað var fyrir rússneska stjórnarandstæðinginn Alexei Navalní með Novichok-taugaeitri að sögn yfirvalda í Þýskalandi. 

Samkvæmt niðurstöðum eiturefnaprófs á sýnum úr Navalní er „ótvírætt“ að honum hafi verið byrlað eitur úr hópi Novichock-taugaeiturs, eftir því sem fram kemur á BBC. 

Navalní var fluttur til Berlínar eftir að hafa veikst skyndilega um borð í flugi frá Síberíu til Moskvu í ágúst. Honum hefur verið haldið sofandi síðan. 

Stuðningsmenn Navalnís fullyrða að eitrað hafi verið fyrir hann með samþykki Vladimírs Pútíns Rússlandsforseta. Yfirvöld í Kreml hafa neitað ásökununum. 

Angela Merkel, kanslari Þýskalands, fundaði í dag með embættismönnum um næstu skref málsins. Þá stendur til að funda um niðurstöðu efnaprófsins á vettvangi NATÓ og Evrópusambandsins. 

Novichok er heiti á hópi taugaeiturs sem þróað var í Sovétríkjunum á 8. og 9. áratug síðustu aldar. 

Tengdar fréttir

Al­ex­ei Navalní

Vill sjá Pútín á bak við lás og slá

• Vissi að hann myndi deyja í fangelsi
• Navalní átti að vera hluti af fangaskiptunum
• Rússar vilja handtaka ekkju Navalnís
• Handteknir fyrir að starfa fyrir teymi Navalnís

» Fleiri tengdar fréttir

• Blogga um frétt