Laundóttir konungs orðin prinsessa

Listakonan Delphine Boël, laundóttir Alberts fyrrverandi konungs af Belgíu, hefur verið sæmd titilinum prinsessa af Belgíu. Áfrýjunardómstóll í Brussel komst að þeirri niðurstöðu í gær.

Delfína prinsessa hefur barist fyrir því undanfarin sjö ár að fá viðurkennt að hún væri dóttir konungs, en konungurinn átti í framhjáhaldi með móður hennar á sjöunda og áttunda áratugnum. Þrátt fyrir að hafa ekki alist upp hjá konungi vörðu þau tíma saman í barnæsku og kallaði hún pabba sinn Papillon (fiðrildi).

Frétt af mbl.is

Framhjáhald konungs bar ávöxt

Albert konungur, sem sagði af sér árið 2013, var fyrr á árinu neyddur til að taka DNA-próf sem leiddi í ljós að Boël væri í reynd dóttir hans. Með konunglegu titlunum hefur Boël unnið fullnaðarsigur í málinu.

Hún mun nú heita Delfína af Saxen-Coburg-Gotha, prinsessa af Belgíu. Þá verða börn hennar tvö sömuleiðis prins og prinsessa.

Í yfirlýsingu frá lögmanni prinsessunnar nýju segir að hún sé ánægð með niðurstöðu málsins.„Hún er ánægð með að úrskurður dómsins bindi enda á áralanga þrautagöngu hennar og fjölskyldunnar. Sigur í dómsmáli kemur aldrei í stað ástar frá föður, en gefur trú á réttlætinu,“ segir í yfirlýsingunni.

Guardian

• Blogga um frétt