Erlent | mbl | 4.10.2020 | 20:53 | Uppfært 21:33

Trump gefin lyf sem alvarlega veikir fá

Heilsa Donalds Trumps Bandaríkjaforseta, sem veikur er af COVID-19, fer batnandi, að sögn lækna hans, sem segja að mögulega verði hann útskrifaður af spítalanum á mánudag. Samt sem áður fékk Trump lyf í dag sem er einungis mælt með að alvarlega veikir COVID-19-sjúklingar taki.

Sean Conley, læknir forsetans, segir að Trump hafi verið gefið steralyfið dexamethasone eftir að súrefnismettun í blóði hans minnkaði. Forsetinn fékk fyrstu skammtana af lyfinu í dag og fékk súrefni í það minnsta einu sinni.

Frétt af mbl.is

Munu kanna niðurstöðurnar gaumgæfilega

Samkvæmt frétt BBC hefur lyfið bjargað mannslífum með því að hægja á ónæmiskerfinu, sem getur orðið ofvirkt hjá COVID-19-sjúklingum. Lyfið þarf þó að nota á réttum tímapunkti. Taki sjúklingur það of snemma getur lyfið haft slæmar afleiðingar í för með sér. Dexamethasone er ekki lyf sem er gefið í vægum tilfellum sjúkdómsins heldur virkar það best þegar það er gefið á sama tíma og fólk þarf á súrefnisgjöf að halda.

Sean Conley, einn af læknum Trumps, svarar spurningum blaðamanna. AFP

Hefur einkenni alvarlegra veikinda

Alþjóðaheilbrigðismálastofnunin (WHO) mælir með því að lyfið sé notað í alvarlegum tilvikum. Súrefnismettun í blóði Trumps féll niður fyrir 94% í gærmorgun en samkvæmt WHO er það einkenni alvarlegra veikinda.

Ýmsir sem forsetanum tengjast hafa reynst smitaðir af kórónuveirunni, þar á meðal Melania Trump forsetafrú. Margir þeirra sem greinst hafa sóttu fjölmennan viðburð í Hvíta húsinu um síðstu helgi hvar tilnefning dómarans Amy Coney Barrett til hæstaréttar fór fram. Viðburðurinn er nú skoðaður sem mögulegur „hópsýkingarviðburður“.

Robert O'Brien, þjóðaröryggisráðgjafi Trumps, sagði í dag að tilfærsla valds frá forsetanum til varaforsetans Mikes Pence væri ekki til umræðu. „Hingað til hefur forsetinn verið í frábæru standi. Hann stjórnar ríkisstjórn landsins.“

Lifandi streymi BBC