Rannsókn á sjóslysinu hefjist „sem allra fyrst“

Forsætisráðherra Eistlands óskaði í dag eftir því að rannsókn hæfist „sem allra fyrst“ á tildrögum þess að farþegaferjan MS Estonia sökk í Eystrasalti með þeim afleiðingum að 852 fórust.

Stutt er síðan heimildarmynd í fimm hlutum kom út með nýrri tilgátu um tildrög sjóslyssins, sem er það mannskæðasta í Evrópu á friðartímum.

Frétt af mbl.is

Rannsaka nýja tilgátu um Estoniu-slysið

„Við viljum rannsaka málið frekar sem allra fyrst til að fá svör við öllum þeim spurningum sem hafa vaknað í tengslum við þessar nýju upplýsingar,“ sagði forsætisráðherrann Juri Ratas í yfirlýsingu að loknum ríkisstjórnarfundi.

Þar kemur fram að ákveðið hafi verið að leggja fram tillögu um sameiginlega rannsókn Finnlands og Svíþjóðar á slysinu.  

Liðsmenn finnska hersins flytja lík fórnarlamba sjóslyssins 29. september, 1994, eða degi eftir slysið. AFP

Sett verður í forgang að rannsaka staðsetningu flaksins og hafsbotninn þar í kring til að átta sig á gati sem kom á skipsskrokkinn og hvort það tengist því að skipið sökk.

Í heimildarmyndinni kom fram að fundist hefði fjögurra metra hola í skipsskrokknum sem ekki hefði verið vitað um áður. Ferjan sökk á leið sinni frá Tallinn í Eistlandi til Stokkhólms 28. september 1994.

Niðurstaða rann­sókn­ar frá ár­inu 1997 á til­drög­um slyss­ins var að sjór hefði streymt inn um hlera á stefni ferj­unn­ar sem leiddi inn á bílaþilfar skips­ins og valdið því að ferj­an sökk í vondu veðri. 

• Blogga um frétt