Erlent | mbl | 15.12.2020 | 11:35 | Uppfært 16.12.2020 7:18

Leyfið verður veitt á Þorláksmessu

AFP

Lyfjastofnun Evrópu (EMA) mun veita leyfi fyrir bóluefni Pfizer-BioNTech á Þorláksmessu og væntanlega verður byrjað að bólusetja í Þýskalandi 26. desember. Þetta herma heimildir þýska blaðsins Bild og vísar blaðið í heimildarmenn úr framkvæmdastjórn ESB og innan þýsku ríkisstjórnarinnar.

Heilbrigðisráðherra Þýskalands, Jens Spahn, staðfestir þetta í samtali við Bild. Áður hafði EMA gefið út að ákvörðunin yrði tekin í síðasta lagi 29. desember. Þetta kemur fram í frétt Bild í dag. Um er að ræða bóluefni Pfizer-BioNTech sem komið í notkun í Bretlandi, Bandaríkjunum og Kanada.

„Þetta eru góðar fréttir fyrir allt Evrópusambandið,“ segir Sphan. Tekið skal fram að þetta hefur áhrif á fleiri ríki, til að mynda Ísland.

Frétt af mbl.is

Vilja markaðsleyfi fyrir jól

Eftir samþykkið verður farið að bólusetja eins fljótt og auðið er og segir Spahn of snemmt að nefna ákveðna dagsetningu í því sambandi. Eins fljótt og hægt er því þannig verður mögulegt að draga úr þjáningum og fækka dauðsföllum segir hann í samtali við Bild. Hann telur að bólusetning geti í síðasta lagi hafist 2-4 dögum eftir samþykki.

Þjóðverjar hafa tryggt sér 11-13 milljónir skammta af bóluefninu á fyrsta ársfjórðungi næsta árs.

Heimildir Reuters fréttastofunnar eru á sama veg, Lyfjastofnun Evrópu mun veita leyfið 23. desember. „Já leyfi EMA verður veitt 23. desember,“ segir heimild Reuters og vísar þar til leyfis stofnunarinnar til að hefja bólusetningar í ríkum ESB og EES með bóluefni Pfizer BioNTech.

EMA gaf það út fyrr í mánuðinum að niðurstaðan myndi liggja fyrir í síðasta lagi 29. desember hvað varðar bóluefni BioNTech-Pfizer og Moderna 12. janúar í síðasta lagi.

Hvorki EMA né BioNTech vildi staðfesta þetta í samtali við Reuters.

Alþjóðaheilbrigðismálastofnunin (WHO) á nú í viðræðum við Pfizer um að bóluefni fyrirtækisins verði með í bólusetningarátaki fyrir ríki á heimsvísu. Til þess að það verði hægt verður Pfizer að bjóða upp á bóluefni á viðráðanlegu verði fyrir fátækari ríki heims.

„Við vitum af grein Bild. Við erum enn að vinna með dagsetninguna 29. sem síðasta dag. Í augnablikinu hefur ekkert breyst þar,“ segir talskona EMA í samtali við AFP-fréttastofuna.

Vaxandi óþolinmæði Sphan fer ekki fram hjá neinum sem fylgir honum á Twitter. Á sunnudag ritaði hann nokkrar færslur þar varðandi bóluefnið og sagði að trúverðugleiki ESB væri í húfi þegar kæmi að viðbragðsflýti sambandsins.

Hann hefur hins vegar staðið fastur á þeirri skoðun sinni að Þýskaland ætti að fylgja öðrum ríkjum ESB hvað varðar leyfisveitingu í gegnum EMA. Með því væri tryggt að farið væri að reglum og fyllsta öryggis gætt.