Erlent | mbl | 30.12.2020 | 14:20

Ofsóttir gera grímur fyrir Vesturlönd

Úígúr-múslimar hafa verið þvingaðir í vinnubúðir þar sem grímur og annar hlífðarvarningur er framleiddur í Kína. Þessu komust rannsakendur New York Times að en vörurnar eru í dreifingu um allan heim. Töluvert hefur verið fjallað um erfiða stöðu þjóðarbrotsins í Kína á undanförnum misserum.

Þegar eftirspurn eftir grímum og öðrum hlífðarvarningi margfaldaðist við útbreiðslu Kórónuveirunnar voru viðbrögð framleiðenda í Kína að auka framleiðsluna og til þess þurfti mannafla. Í myndskeiðinu sem fylgir fréttinni sést þegar stórir hópar fólks koma til vinnu í verksmiðjunum til að taka þátt í framleiðslunni. Blaðamenn NYT rýndu í hundruði myndskeiða frá verksmiðjunum til að geta sýnt með óyggjandi hætti fram á að þar væru Úígúrar á ferð. Heimildarmenn NYT fullyrða að þar á meðal sé fólk sem sé þvingað til að vinna.

Í Xinjiang-héraði í Kína þar sem Úígúrar eiga uppruna sinn fjölgaði verksmiðjum sem framleiða hlífðarvarning (e. PPE) úr fjórum í 51 þegar faraldurinn tók að herja á heimsbyggðina. Eigi grímur og annar varningur uppruna sinn í héraðinu mun það vera sterk vísbending um að fólk sem er þvingað til starfa hafi átt þátt í framleiðslunni.

Málið er rakið í ítarlegri fréttaskýringu frá New York Times í myndskeiðinu en uppljóstrunin var gerð í júlí.

mbl.is birtir þessa dagana skýringar af sem blaðamenn New York Times hafa unnið fyrir alla mánuði þessa viðburðaríka árs. Kórónuveiran er þar fyrirferðarmikil en önnur stór fréttamál á árinu eru einnig til skoðunar, þar má nefna dauða George Floyds í höndum lögreglunnar í Minneapolis og forsetakosningarnar í Bandaríkjunum.