Erlent | mbl | 5.2.2021 | 0:13 | Uppfært 6:10

Taylor Greene vikið úr nefndum

Taylor Greene, hér til vinstri, á gangi í þinghúsinu fyrr í dag. AFP

Fulltrúadeild Bandaríkjaþings kaus rétt í þessu að víkja þingkonunni Marjorie Taylor Greene úr þeim nefndum sem hún hafði þegar verið skipuð til að sitja í.

Féllu atkvæði þannig að 230 kusu með því að svipta hana þessum störfum, þar á meðal ellefu repúblikanar. 199 greiddu atkvæði gegn tillögunni.

Greene er ötull fylgismaður samsæriskenninga og hefur látið ýmis misgáfuleg ummæli falla í tíð sinni sem stjórnmálamaður.

Í ræðu sem Greene hélt áður en hún bauð sig fram til Bandaríkjaþings árið 2020 kallaði hún Nancy Pelosi, forseta fulltrúadeildarinnar, „föðurlandssvikara“ sem ætti að taka af lífi.

„Það er hægt að taka fólk af lífi fyrir föðurlandssvik. Nancy Pelosi hefur gerst sek um föðurlandssvik,“ sagði hún.