150 manns saknað eftir flóð

Óttast er um líf allt að 150 manns eftir að stórt jökulbrot hrundi úr Himalajafjöllum í morgun.

Jökulbrotið lenti á stíflu í dal í Uttarakhand-ríki á norðanverðu Indlandi, og voru þorp í grenndinni rýmd. Myndbönd, sem deilt var á samfélagsmiðlum, sýna flóð sem kom í kjölfar jökulbrotsins streyma í gegnum svæðið.

„Þetta kom mjög skjótt, það var enginn tími til að vara neinn við,“ segir Sanjay Singh Rana við Reuters, en hún er íbúi á svæðinu.

Vatnshæð ár sem rennur í gegnum svæðið er nú einum metra meiri en venjulega, að sögn ráðamanns í Uttarakhand-ríki.

Narendra Modi forsætisráðherra Indlands segist fylgjast grannt með stöðunni og hefur flugher landsins verið virkjaður til aðstoðar íbúum.

Frétt BBC.

• Blogga um frétt