Erlent | AFP | 11.2.2021 | 7:24 | Uppfært 12.2.2021 9:05

Fær eftirlætiskökuna á 117 ára afmælisdaginn

Elsti Evrópubúinn, franska nunnan systir André, er 117 ára í dag. Systir André, sem var skírð Lucile Randon, fæddist 11. febrúar árið 1904. Afmælisdeginum er fagnað með eftirlætiseftirrétti hennar, l'omelette norvégienne.

André er nýlega laus undan Covid-19 en hún sagði í samtali við AFP-fréttastofuna skömmu fyrir afmælið að hún hefði ekki gert sér grein fyrir því að hafa fengið kórónuveiruna. Alls smitaðist 81 íbúi á hjúkrunarheimilinu sem hún dvelur á í Toulon og létust tíu þeirra. „Mér er sagt að ég hafi fengið veiruna. Ég var mjög þreytt, það er alveg rétt en ég áttaði mig ekki á því.“

Systir André, Lucile Randon, er 117 ára í dag. AFP

Talsmaður hjúkrunarheimilis Sainte-Catherine-Labouré, David Tavella, segir að André hafi neyðst til þess að vera innilokuð í herbergi sínu án heimsóknar vegna veirunnar. Afmæli hennar hressi því alla við á heimilinu.

Frétt af mbl.is

Elsti Evrópubúinn sigraðist á Covid-19

Fær sér vínglas á hverjum degi

Sjálf var André ekki búin að skipuleggja neitt en heimilið hefur aftur á móti undirbúið daginn fyrir hana og aðra íbúa. Sérstök messa verður haldin á hjúkrunarheimilinu og svo verður blásið til veislu þar sem foie gras er í forrétt, fylltur hani með porcini-sveppum og eftirlæti afmælisbarnsins, kakan góða l’omelette norvégienne, sem verður skolað niður með glasi af púrtvíni. Aftur á móti er humar eftirlætismatur André og ekki spillir fyrir að drekka vínglas með. „Ég drekk lítið glas af víni á hverjum degi,“ segir hún.

André er fædd í Ales og fjölskyldan var mótmælendatrúar. Hún er alin upp þar ásamt þremur bræðrum. Ein elsta minning hennar er þegar tveir bræður hennar sneru aftur heim eftir að hafa barist í fyrri heimsstyrjöldinni.

Hún snerist til kaþólsku er hún var 26 ára og gekk til liðs við Filles de la Charité er hún var 41 árs. Hún starfaði á sjúkrahúsi í Vichy í 31 ár og síðan dvaldi hún í 30 ár á hjúkrunarheimili í frönsku Ölpunum áður en hún flutti til Toulon.