Erlent | mbl | 13.2.2021 | 13:32

Sá ekki út fyrir lyklum

Vafalítið krefst bíltúr frá Tyrklandi til Bergen í Noregi töluverðra vegtolla sem nú eru víðast hvar innheimtir rafrænt. Öllu má þó ofgera og þessi vörubifreiðarstjóri hafði nær ekið eftirlitsmann norsku umferðarstofunnar niður í gær þar sem hann sá ekkert út fyrir vegtollalyklum og er þá annað ótalið sem byrgði honum sýn, GPS-skjár, fáni og skilti með nafninu hans. Ljósmynd/Statens vegvesen

„Þetta er stórhættulegt, hann sér nánast ekkert út og kemur ekki auga á neitt sem er fimm metra frá honum,“ segir Terje Bødtker, eftirlitsmaður norsku umferðarstofunnar Statens vegvesen, sem átti fótum fjör að launa í gær þar sem hann var við störf í Os, sunnan við Bergen.

Hann hugðist þá stöðva vörubifreið til að ræða við bílstjórann sem hafði hlaðið svo miklu dóti innan á framrúðuna að augljóst var að hann skapaði stórhættu á vegum úti. Hafði bílstjórinn, sem var að koma akandi frá Tyrklandi með vörur til Bergen, límt þar upp ekki færri en sjö vegtollalykla auk þess sem GPS-skjár, fáni og skilti með nafni hans drógu enn gerr úr sýn hans á evrópska vegi.

Kom ökumaðurinn enda ekki auga á Bødtker eftirlitsmann og hafði nær ekið hann niður. „Hann hefði getað ekið á mig hefði ég staðið þar sem ég stóð,“ segir Bødtker í samtali við norska ríkisútvarpið NRK, en honum var nauðugur einn kostur að kalla lögreglu til og tókst henni að stöðva för ökumannsins.

Þurfti að skafa límið af

Gaf hann þá skýringu að hann hefði um langa hríð ekið með búnaðinn á rúðunni og væru honum norskar umferðarreglur ekki tamar. „Það var svo mikið lím innan á framrúðunni að hann varð að nota hníf til að skafa það af áður en við hleyptum honum áfram,“ segir Bødtker.

Bílstjórinn slapp þó með tiltal eftirlitsmanns og lögreglu. Fyrsta brot í þessum flokki gerir ráð fyrir akstursbanni þar til bætt hefur verið úr og gerði ökumaður það á staðnum. Öðru broti fylgja sömu skilyrði, en það er ekki fyrr en við þriðja sams konar brot að ökumanni er gerð 8.000 króna sekt, jafnvirði rúmlega 121.000 íslenskra króna.

Terje Bødtker umferðareftirlitsmaður kippti sér lítið upp við lífsháskann í gær, ökumenn með græjum þaktar rúður séu daglegt brauð á norskum vegum. Best sé að gæta þess bara að hafa rými til að forða sér þegar ökumenn sjá ekki eftirlitsmennina sem reyna að stöðva þá. Ljósmynd/Úr einkasafni

Bødtker eftirlitsmaður telur uppákomuna í gær þó varla til sérstakra tíðinda, hún sé ekki einu sinni versta tilfellið sem rekið hafi á fjörur þeirra félaga hjá Statens vegvesen, minnst einu sinni í mánuði stöðvi þeir ökumenn með framrúðuna þakta græjum og skreytingum ýmiss konar.

„Þetta er bara hluti af vinnudeginum. Maður þarf alltaf að hafa það bak við eyrað að hafa rými til að forða sér undan,“ segir Terje Bødtker umferðareftirlitsmaður um daglegan raunveruleika starfs síns.

NRK

Midtsiden