Átök eftir handtöku rappara

Lögreglu og mótmælendum lenti saman í spænsku borgunum Madríd og Barcelona í kvöld þar sem fólk kom saman til að mótmæla fangelsisvist rapparans Pablo Hasel.

Hasel var dæmdur í níu mánaða fangelsi fyrir Twitter-færslur og texta í lögum sínum þar sem hann var sagður upphefja hryðjuverkastarfsemi auk þess sem hann var sakaður um meiðyrði gagnvart spænsku krúnunni og ríkinu.

Frétt af mbl.is

Rappari lokar sig inni til að forðast fangavist

Samkvæmt frétt AFP komu nokkur hundruð mótmælendur saman á torgi í Madríd þar sem lausnar Hasel var krafist. Stórir borðar þar sem ritskoðun var mótmælt voru sjáanlegir.

Grímuklæddir mótmælendur hentu flöskum í átt að lögreglu og lögregla skaut gúmmíkúlum í átt að hópi mótmælenda.

Mótmælendur kröfðust þess að Hasel yrði látinn laus. AFP

Svipað var uppi á teningunum í Barcelona en alls voru sex handteknir í kvöld.

Hasel var handtekinn í háskólanum í Lleida í Katalóníu í gær en þar hafði hann lokað sig inni á mánudag til að forðast fangavist. Frest­ur Hasel til að gefa sig fram við lög­reglu rann út á föstu­dag­inn

• Blogga um frétt