Þúsundir mótmæltu skattahækkunum

Tugþúsundir manna í Kólumbíu mótmæltu í dag fyrirhuguðum breytingum á skattkerfi landsins sem gagnrýnendur segja gera íbúana fátækari. Fóru mótmælin fram í skugga kórónuveirufaraldursins, en dauðsföll af völdum veirunnar hafa aldrei verið fleiri þar í landi en um þessar mundir.

Ivan Duque, forseti Kólumbíu, og ríkisstjórn hans hafa lagt til að hækka skattgreiðslur þeirra sem hafa tekjur sem eru jafnvirði 80 þúsund íslenskra króna á mánuði. Með þessu er ríkisstjórnin að lækka frítekjumark launþega í landinu.

Þá er einnig lagt til að skattleggja jarðarfarir, leggja söluskatt á fleiri vörur og þjónustu svo sem vatn og rafmagn, auk þess sem lagt er til að komið verði á hátekjuskatti fyrir þá sem hafa tekjur yfir (jafnvirði) 330 þúsund íslenskum krónum eða búa yfir eignum með samanlagt virði yfir 160 milljónir íslenskra króna.

Mikil átök urðu í borginni Medellin í Kólumbíu í dag vegna fyrirhugaðra skattahækkana. AFP

Mótmælandi gerir sig líklegan til að grýta lögreglumenn. AFP

Tilgangur breytinga á skattkerfi landsins er að afla ríkissjóði Kólumbíu 23,3 þúsund milljarða kólumbískra pesóa, jafnvirði 778 milljarða íslenskra króna, á tíu árum. Landið hefur upplifað mikinn efnahagssamdrátt á liðnu ári og lækkaði verg landsframleiðsla um 6,8% í fyrra.

Mikill fjöldi fólks mætti á götur margra borga til að mótmæla áformum ríkisstjórnarinnar og voru 47.500 lögreglumenn og aðrir viðbragðsaðilar kallaðir út vegna mótmælanna.

Víða var mótmælt. AFP

Gríðarlegur fjöldi viðbragðsaðila var kallaður út til að mæta mótmælendum. AFP

Um fimmtungur íbúa landsins er án atvinnu og eru lágmarkslaun í landinu jafnvirði ríflega 30 þúsund íslenskra króna. Um 50 milljónir búa í landinu.

„Þessar breytingar munu valda því að milljónir Kólumbíumanna munu líða hungur,“ sagði Francisco Maltese, leiðtogi verkalýðshreyfingarinnar CUT.

AFP

AFP

Þessir heilbrigðisstarfsmenn fögnuðu mótmælendum og hvöttu þá til dáða. AFP

AFP

Þó nokkur átök urðu í dag. AFP

• Blogga um frétt