Erlent | mbl | 24.5.2021 | 22:38 | Uppfært 27.5.2021 18:41

„Eins og að vera handtekinn“

Frank Even Hagen hjúkrunarfræðingur segir farir sínar ekki sléttar þar sem hann situr á sóttkvíarhóteli í Ullensaker-sveitarfélaginu við Gardermoen. Honum finnst hann hafa verið handtekinn eftir að flugvallarlögreglan skipaði honum í hótelsóttkví við komu til Noregs úr heimsókn til veiks ættingja í Danmörku. Ljósmynd/Aðsend

Frank Even Hagen, tæplega sextugur og fullbólusettur norskur hjúkrunarfræðingur, líkir viðtökunum á höfuðborgarflugvellinum Gardermoen við handtöku þegar hann kom úr heimsókn til Danmerkur á miðvikudaginn.

Hagen situr nú á sóttkvíarhóteli í nágrenni flugvallarins eftir að hafa engu tauti komið við lögreglu sem tók á móti honum á flugvellinum. Hjúkrunarfræðingurinn starfar á sjúkrahúsinu í Førde í Sunnfjord í Vestland-fylki. Hann skrapp til Danmerkur í fimm daga til að heimsækja veikan ættingja sinn og kveðst því, í samtali við norska dagblaðið VG, ekki líta á för sína sem ónauðsynlegt ferðalag.

Tjáð að ákvörðunin væri tekin

Reiknaði Hagen með að fá að sitja í sóttkví á heimili sínu í Førde þar sem hann er í fríi fram á föstudag, en í mars kvað Bent Høie heilbrigðisráðherra upp þann úrskurð, að bólusett heilbrigðisstarfsfólk gæti mætt beint til starfa við komu til landsins, en þyrfti þó að halda vikulanga sóttkví í frítíma sínum.

„Lögreglan á Gardermoen notaði ekki langan tíma til að fara gegnum pappírana mína frá sjúkrahúsinu. Ég mátti ekki hringja í neinn til að segja frá því hvað væri að gerast. Mér var bara tjáð að ákvörðunin væri tekin,“ segir Hagen af viðtökunum á miðvikudaginn.

Öryggisverðir hafi svo tekið við honum og fært hann á sóttkvíarhótelið þar sem hann situr nú, bitur og sár. „Ég upplifi þetta eins og ég hafi verið handtekinn og sé hafður í haldi,“ segir hjúkrunarfræðingurinn, en auk þess að vera fullbólusettur gekkst hann undir kórónuveirupróf í Danmörku, áður en hann hélt til baka til Noregs, og svo aftur á Gardermoen-flugvellinum við komuna.

Ferðin ekki nauðsynleg

„Ég kom aðeins fyrr heim en ég hafði ætlað mér, ætlaði að vera alveg viss um að niðurstaða úr veiruprófinu sem ég hefði átt að fara í á vegum vinnustaðarins á fimmtudaginn lægi fyrir tímanlega áður en ég færi á vakt,“ segir Hagen að lokum, en af því prófi verður ekki þar sem hann er nú gegn eigin vilja vistaður á hóteli við Gardermoen þar sem honum er ætlað að dvelja í sjö daga.

Frá sveitarfélaginu Ullensaker, en þar er Gardermoen-flugvöllurinn og einnig sóttkvíarhótelin, fékk Hagen þau svör, þegar hann bar upp kvörtun sína, að þar sem ekki væri hægt að líta á ferðalag hans til Danmerkur sem nauðsynlegt nyti hann ekki undanþágu frá reglum um sóttkví á hóteli í stað eigin heimilis.

Firda (greindi fyrst frá en rekur læsta síðu)