Fjórir handteknir í Indónesíu fyrir að selja stolin bóluefni ætluð föngum

Fjórir hafa verið handteknir í Indónesíu í tengslum við það að hafa stolið Covid-19 bóluefnum ætluð föngum og selt þau til almennings. Stjórnvöld í Indónesíu greina frá þessu.

Þeir grunuðu eiga að hafa stolið meira en eitt þúsund skömmtum af Sinovac bóluefninu úr birgðum sem ætluð voru föngum og selt hvern skammt á það sem samsvarar um tvö þúsund íslenskar krónur í borgunum Jakarta og Medan.

Á meðal þeirra grunuðu er læknir úr fangelsi í Medan og heilbrigðisfulltrúi að sögn indónesísku lögreglunnar. Þeir eiga fyrir höfði sér lífstíðarfangelsisvist verði þeir sakfeldir.

Frétt af mbl.is

Stefna á framleiðslu á 600 milljónum skammta

Indónesía hefur orðið illa fyrir barðinu á heimsfaraldrinum og er í miðjum klíðum við að bólusetja þjóðina sem telur um 270 milljón manns en íbúar fá bólusetningu gjaldfrjálst.

Nú bíða enn tugir milljóna manna eftir bólusetningu á meðan bóluefni er enn af skornum skammti fyrir forgangshópa sem eiga hvað mestu hættu á að smitast. Þar á meðal eru fangar í yfirfullum fangelsum landsins sem þekkt eru fyrir léleg skilyrði.

Indónesía hefur nú tilkynnt um yfir 1,7 milljón kórónuveirusmit og tæplega 50 þúsund dauðsföll af völdum hennar.

• Blogga um frétt