Erlent | mbl | 26.5.2021 | 12:17 | Uppfært 12:52

Nató fordæmir aðgerðir Hvíta-Rússlands

Nató fordæmir aðgerðir Hvíta-Rússlands þegar flugvél Ryanair sem var á flugi um lofthelgi landsins var neydd til lendingar og blaðamaður handtekinn sem gagnrýnt hafði Alexander Lukashenko, forseta landsins, og yfirvöld í Hvíta-Rússlandi. AFP

Norðuratlantshafsráðið fordæmir aðgerðir Hvíta-Rússlands á sunnudaginn þegar flugvél Ryanair sem var á ferð á milli Aþenu og Vilnius, var gert að lenda í Minsk, höfuðborg Hvíta-Rússlands. Voru blaðamaðurinn Roman Protasevich og Sofia Sapega unnusta hans handtekin á flugvellinum en Protasevich var í útlegð vegna gagnrýninnar umfjöllunar um stjórnvöld í landinu.

Frétt af mbl.is

ESB krefst lausnar Protasevich

Í tilkynningu frá Nató segir að um sé að ræða ólíðandi aðgerð sem brjóti gegn almennum reglum um farþegaflug í alþjóðlegri lofthelgi. Þá hafi aðgerðirnar sett farþega og áhöfn í hættu. Jafnframt er kallað eftir sjálfstæðri rannsókn á atvikinu af hálfu Alþjóðaflugmálastofnunarinnar (ICAO) og stuðningi lýst yfir við aðgerðir vesturvelda.

Frétt af mbl.is

Ótrúleg aðför og illa dulbúin hótun Hvít-Rússa

Ráðið segir í yfirlýsingu sinni einnig að handtaka Protasevich sé á pólitískum grundvelli og beint gegn fjölmiðlafrelsi. Er þess krafist að Protasevich og Sapega sé umsvifalaust sleppt úr haldi. Þá er jafnframt lýst yfir stuðningi við Lettland eftir að lettneskum erindrekum var vísað frá Hvíta-Rússlandi.

Guðlaugur Þór Þórðarson utanríkisráðherra hefur gagnrýnt aðgerðir Hvíta-Rússlands og flugfélög hafa forðast að fljúga yfir lofthelgi landsins eftir atvikið.