Missir stöðuna eftir löðrung eiginkonunnar

Peter Lescouhier, sendiherra Belgíu í Suður-Kóreu, verður sviptur sendiherraembættinu vegna óviðeigandi hegðunar sendiherrafrúarinnar Xiang Xueqiu. Myndskeið, sem er aðgengilegt neðar í fréttinni, náðist af henni löðrunga starfsmann í verslun í apríl síðastliðnum. 

Það atvikaðist þannig að starfsfólk í versluninni vildi kanna hvort fötin sem hún væri í væru hennar eigin, eftir að grunsemdir um að Xiang hefði stolið úr versluninni vöknuðu.

Frétt af mbl.is

Eiginkona sendiherra krefst friðhelgi

Xiang hitti síðar starfsmanninn og baðst afsökunar á „óboðlegri hegðun“, að sögn utanríkisráðuneytis Belgíu. Afsökunarbeiðnin hefur þó greinilega ekki þótt nægja því Sophie Wilmes, utanríkisráðherra Belgíu, ákvað að binda enda á skipun Lesouchiers í sumar. Hann hafði sinnt embættinu í þrjú ár. 

Utanríkisráðuneytið sagði í tilkynningu að þrátt fyrir að Lescouhier hefði sinnt sínu starfi vel leyfði „núverandi ástand“ honum ekki að „sinna hlutverki sínu áfram með viðeigandi hætti.“