Erlent | mbl | 2.7.2021 | 7:06

Einungis 11% heimsbyggðarinnar bólusett

Bólusetning í Laugardalshöll. Ferlið hefur gengið talsvert hraðar fyrir sig hér á landi en víða annars staðar. mbl.is/Eggert Jóhannesson

Á sama tíma og tæp 60% Íslendinga hafa fengið fulla bólusetningu gegn Covid-19 og bólusetning er hafin hjá um 20% til viðbótar hafa einungis 11% heimsbyggðarinnar fengið bólusetningu gegn Covid-19 og er hún hafin hjá 13% heimsbyggðarinnar til viðbótar.

Frétt af mbl.is

Myndi nægja til að bólusetja heimsbyggðina

Eins og áður hefur verið greint frá hafa sérfræðingar áhyggjur af þróun mála og sagt mikilvægt að ná útbreiddri bólusetningu á heimsvísu eins fljótt og auðið er. Að öðrum kosti gæti kórónuveiran náð að stökkbreytast enn frekar í samfélögum þar sem bólusetning er ekki útbreidd.

Tölur Our World in data, sem voru uppfærðar síðast 30. júní. Síðan þá hefur bólusettum fjölgað lítið eitt á Íslandi. Kort/Our World in data

Einungis eitt prósent Afríkubúa með fulla bólusetningu

Hvað heimsálfurnar varðar þá er staðan best í Norður-Ameríku og verst í Afríku. Í Norður-Ameríku hafa 33% íbúa fengið fulla bólusetningu gegn Covid-19 og er bólusetning hafin hjá tæpum 10% til viðbótar. Í Afríku er staðan aftur á móti þannig að rúmt prósent hefur fengið fulla bólusetningu gegn Covid-19 og er bólusetning hafin hjá svipuðum fjölda.

Evrópa er næstbest stödd hvað varðar bólusetningar en 28% Evrópubúa eru bólusettir og er bólusetning hafin hjá 13% þeirra.

Unicef hefur að undanförnu kallað eftir styrkjum sem fara munu í bólusetningar í fátækari löndum.

„Til þess að stöðva útbreiðslu Covid-19 þarf að útrýma veirunni alls staðar. Við erum í kapphlaupi við náttúruna og á meðan veiran dreifir sér einhvers staðar í heiminum er hætta á að hún stökkbreytist og stofni þeirri vinnu sem við höfum lagt í bólusetningar hingað til í hættu. Því þarf að tryggja að öll ríki heimsins hafi jafnan aðgang að bóluefnum,“ skrifa samtökin með söfnuninni.