Tveir heimilismenn hjúkrunarheimilisins Grundar hafa greinst með kórónuveiruna. Smitið má rekja til starfsmanns heimilisins sem var við vinnu í síðustu viku.
Fram kemur í tilkynningu að búið sé að skima alla heimilismenn sem viðkomandi starfsmaður var í samskiptum við. Ekki er búist við því að fleiri heimilismenn hafi smitast.
Hinir smituðu heimilismenn hafa verið settir í einangrun á herbergjum sínum og eru einkennalitlir. Heimilið er lokað fyrir öllum heimsóknum næstu daga nema með sérstökum undanþágum. Þá hefur inntaka nýrra heimilismanna verið stöðvuð tímabundið.