Yfir þúsund nemenda rænt í Nígeríu

Yfir þúsund nemendum hefur verið rænt á árinu í norðurhluta Nígeríu. Skortur á öryggisgæslu og tregi yfirvalda við að taka almennilega á vandamálinu er sagt hafa leitt til þess að ránsfaraldur geisar nú á svæðinu.

Breski fréttamiðillinn the Guardian greinir frá þessu.

Mörg fórnarlambanna eru skólabörn og minnir ástandið óneitanlega á það þegar Boko Haram rændi hátt í 300 skólastúlkum árið 2014.

Talið er að fjöldi ræningja á svæðinu sé hátt í 3.000. Saka margir yfirvöld í Nígeríu um aðgerðaleysi en öryggisbresturinn hefur haft neikvæð áhrif á mætingu barna í skóla á svæði þar sem hlutfall ólæsis er hátt og barnabrúðkaup tíð.

Í síðustu viku voru 27 nemendur frelsaðir gegn lausnargjaldi eftir að hafa verið teknir af ræningjum. Sex nemendur náðu að flýja árásarmennina en 87 nemendur sitja enn eftir.

• Blogga um frétt