Ever Given aftur í gegnum Súez-skurðinn

Flutningaskipið Ever Given, sem sigldi í strand í Súez-skurðinum og stöðvaði þar alla umferð í heila viku í mars s.l. sigldi aftur í gegnum skurðinn í dag en í þetta skiptið áfallalaust, að því er greint frá í frétt BBC.

Frétt af mbl.is

Flutningaskip þverar Súezskurðinn

Var það í samfloti með öðrum skipum sem sigldu frá Miðjarðarhafi til Rauðahafsins, að því er stjórn Súez-skurðsins greindi frá á Twitter í dag.

Ever Given, sem er eitt af stærstu flutningaskipum heims flutti 18.300 gáma til Rotterdam, Felixstowe og Hamborgar og er nú á leið sinni til Kína.

550 milljónir bandaríkjadala í skaðabætur

Rúmlega fjórir mánuði eru síðan skipið strandaði í Súez-skurðinum vegna vinda og stöðvaði þar með umferð fjölda skipa með tilheyrandi raski á vöruflutningi milli landa.

Mikla vinnu kostaði að losa skipið en þegar það loksins tókst fór stjórn Súez-skurðsins fram á að eigandi Ever Given, japaninn Shoei Kisen, greiddi þeim 916,5 milljónir bandaríkjadala í skaðabætur fyrir tjónið sem ströndun skipsins olli, jafnvirði um 117 milljarða króna.

Shoei endaði þó á því að þurfa einungis að reiða af hendi 550 milljónir bandaríkjadala, jafnvirði 70 milljarða króna til stjórnar Egyptalands fyrir skaðann.

• Blogga um frétt