Erlent | mbl | 30.8.2021 | 8:20 | Uppfært 8:35

Börn létust í drónaárás Bandaríkjanna

Að minnsta kosti þrjú börn voru á meðal þeirra sem létust í drónaárás Bandaríkjahers í Kabúl, að sögn vitna. Árásin beindist gegn bardagamönnum Ríkis íslams sem eru helstu andstæðingar talíbana.

Í það minnsta sex almennir borgarar létust í árásinni en sumir fjölmiðlar segja að níu manns í sömu fjölskyldu hafi týnt lífi, þar af sex börn.

Al Jazeera greinir frá þessu.

Bandarísk yfirvöld segjast meðvituð um mannfall óbreyttra borgara í árásinni en segja að fjöldi árásarmanna hafi einnig verið drepnir. Þeir voru, að sögn bandarískra yfirvalda að búa sig undir að ráðast á flugvöllinn í Kabúl.

Eins og Zabihullah Mujahid, talsmaður talíbana, greinir frá í meðfylgjandi myndskeiði vinna þeir nú að því að mynda nýja ríkisstjórn í Afganistan. Hann segir það krefjast þolinmæði.

Eldflaugar og sjálfsmorðsárásir

Árásin var framkvæmd eftir að bandarískir hermenn sáu fólk hlaða skott bíls sprengiefnum nærri flugvellinum í Kabúl. Dróni hersins skaut þá eldflaug að bílnum.

Nokkuð hefur verið um átök í Kabúl upp á síðkastið. Öfgahópurinn Ríki Íslams stóð fyrir sjálfsmorðssprengjuárás í síðustu viku en þá féllu 100 manns, þeirra á meðal 13 bandarískir hermenn. Joe Biden Bandaríkjaforseti hefur varað við því að miklar líkur séu á frekari árásum.

Þá var eldflaugum skotið í átt að flugvellinum í Kabúl í morgun.