Erlent | AFP | 10.11.2021 | 14:28

Ástandið á landamærunum „óviðunandi“

Hundruð flóttamanna hafast nú við á landmærum Hvíta-Rússlands og Póllands. AFP

Michelle Bachelet, mannréttindafulltrúi Sameinuðu þjóðanna, segir ástandið á landamærum Póllands og Hvíta-Rússlands „óviðunandi“, en hundruð flóttamanna dvelja nú við landamærin og reyna að freista þess að komast til Póllands. AFP-fréttastofan greinir frá.

Mjög kalt er á svæðinu og fer hitastig undir frostmark á nóttunni. Bachelet segir flóttafólkið ekki eiga að þurfa að sofa aðra nótt undir berum himni. Talið er að jafnvel 3.000 til 4.000 flóttamenn til viðbótar séu á leið að landamærunum og talsmaður pólsku ríkisstjórnarinnar sagði blaðamönnum í gær að búist væri við því að staðan myndi versna á næstunni og að vopn kæmu þá við sögu. Um 50 flóttamenn hafa nú þegar verið handteknir.

Frétt af mbl.is

Yfir 50 flóttamenn handteknir við landamæri

„Það fyllir mig skelfingu að vita til þess að mikill fjöldi flóttafólks dvelji nú í örvæntingu sinni við hörmulegar aðstæður í ískulda á landamærum Hvíta-Rússlands og Póllands. Ég hvet ríkin til að grípa til tafarlausra aðgerða og leysa úr þessu óásættanlega ástandi,“ sagði Bachelet í yfirlýsingu sem hún sendi frá.

Frétt af mbl.is

Pólverjar stöðva fjölda flóttamanna við landamæri

Margir flóttamannanna sem reyna að komast til Póllands eru á flótta undan fátækt í ríkjum Mið-Austurlanda. Þeir segja Hvít-Rússa ekki leyfa þeim að komast aftur til borgarinnar Minsk og fljúga heim á meðan Pólverjar leyfi þeim ekki að komast yfir landamærin og sækja um hæli.

Gagnrýnendur á Vesturlöndum hafa sakað Hvíta-Rússland um að nota flóttamenn sem pólitísk peð með því lokka fólk frá Mið-Austurlöndum til Hvíta-Rússlands og senda þá yfir landamærin til Evrópusambandsins í hefndarskyni vegna refsiaðgerða.

Þá hefur Pólland, sem er aðili bæði að ESB og NATO, verið harðlega gagnrýnt fyrir afstöðu sína í flóttamannamálum undanfarin ár.