Barn látið eftir fall – tveir handteknir

Tvö börn, sem eru bæði yngri en tíu ára, fundust alvarlega slösuð í Hässelby í vesturhluta Stokkhólms í gær. Annað barnanna lést síðar af sárum sínum. Hitt er í lífshættu.

Tveir fullorðnir sem tengjast börnunum náið hafa verið handteknir grunaðir um morð og morðtilraun. 

Börnin tvö fundust fyrir utan fjölbýlishús í Hässelby og voru þau flutt á sjúkrahús með þyrlu. Lögreglan telur að þau hafi fallið til jarðar úr mikilli hæð, að sögn SVT.

AFP

Gat ekkert sagt um áverka

„Þau eru alvarlega slösuð,“ sagði talsmaður lögreglunnar, Helena Boström Thomas, í gærkvöldi. Tilkynning barst lögreglunni klukkan 22 að staðartíma í gærkvöldi og í morgun tilkynnti lögreglan að annað barnanna hafi látist af sárum sínum. Spurður hvort börnin hafi verið með áverka sem tengjast ekki fallinu sagðist talsmaður lögreglunnar í morgun ekki vilja tjá sig um það.

Lögeglan að störfum á vettvangi í morgun. AFP

Fullorðinn einstaklingur sem tengist börnunum fannst slasaður í íbúð í gærkvöldi. Hann og annar fullorðinn voru handteknir í gærkvöldi og eru þeir núna í varðhaldi. Um er að ræða karl og konu.

• Blogga um frétt