Netflix kært vegna þátta um morð Olofs Palme

Streymisþjónustan Netflix á yfir höfði sér meiðyrðamálsókn í Svíþjóð vegna nýrrar þáttaraðar „The Unlikely Murderer“. Þættirnir fjalla um morðið á Olof Palme, fyrrverandi forsætisráðherra Svíþjóðar, árið 1986 sem enn þann dag í dag telst óupplýst. 

Frétt af mbl.is

Engström grunaður um morðið

Í kröfugerð sem lögð var fram í dómsmálaráðuneyti Svíþjóðar, sem fréttastofa AFP hefur fengið  afrit af, eru rök færð fyrir því að túlkun Netflix á persónu Stig Engstrom, fyrrverandi auglýsingaráðgjafa, sem byssumannsins sé „kristaltært mál í tengslum við ærumeiðingar“.

Frétt af mbl.is

Hálfgerð „Agatha Christie-niðurstaða“

Niðurstaða áratugalangrar rannsóknar Kristers Peters­sonar leiddi í ljós í fyrra að Engström, sem einnig var kallaður Skandia-maðurinn, hafi að öllum líkindum verið morðingi Olofs Palme. 

Sekt Engstöm aldrei sönnuð

Engström lést árið 2000 og var því aldrei kærður fyrir morðið en lá á sínum tíma undir grun fyrir það og var á meðal fjölmargra sem yfirheyrðir voru á sínum tíma, þegar þessi yfirgripsmesta glæparannsókn í sögu Svíþjóðar hófst. 

Netflix-þáttaröðin sem um ræðir er byggð á verðlaunabók rannsóknarblaðamannsins Thomasar Petterssonar. Í henni er Engströn sýndur, þá 52 ára, skjóta Palme og konu hans og snúa síðan á lögregluna, með því að gefa sig fram sem vitni í málinu. 

Sýning þáttanna hefur vakið miklar deilur í Svíþjóð.

Netflix hefur varið tilvist og framleiðslu þáttanna og bendir á að texti birtist í lok hvers þáttar þar sem fram kemur að ekki hafi verið sannað að Engström hafi verið morðingi Palme. 

Trúnaður ríkir um hver stendur á bak við kæruna á hendur Netflix. Fyrrverandi eiginkona Engströms, Margretha, hefur gagnrýnt framleiðslu þáttanna og túlkun þeirra á persónu manns hennar, en gaf þó í skyn í viðtali að hún hyggist ekki grípa til lagalegra aðgerða gagnvart Netflix. 

• Blogga um frétt