Játar að hafa stungið sín eigin börn

Faðir tveggja barna sem fundust alvarlega særð eftir að hafa verið stungin og fleygt út um glugga á fjölbýlishúsi í bænum Häs­sel­by, rétt fyr­ir utan Stokk­hólm, aðfaranótt mánudags, hefur játað á sig verknaðinn. Annað barn­anna er látið en hitt ligg­ur al­var­lega slasað á sjúkra­húsi.

Frétt af mbl.is

Í gæsluvarðhald grunaður um barnsmorð

Maðurinn var úrskurðaður í gæsluvarðhald á mánudaginn síðastliðinn vegna gruns um manndráp og tilraun til manndráps. Hann játaði svo verknaðinn á sig í skýrslutöku í dag, að sögn Malin Rådström, lögmanns hans.

„Það er alveg ljóst að þetta mun skipta máli fyrir rannsóknina en það er samt mikilvægt að við höldum áfram að skoða allar hliðar á málinu,“ segir Maria Franzén, deildarsaksóknari.

Faðirinn hefur játað að hafa stungið börn sín tvö og svo fleygt þeim út um glugga fjölbýlishúss. AFP

Vegna játningar mannsins ákvað héraðsdómurinn í Solna að framlengja gæsluvarðhaldi yfir manninum í dag, að því er SVT greinir frá. Hann sætir gæsluvarðhaldi á Karólínska sjúkrahúsinu en heim­ild­ir Aft­on­bla­det herma að maður­inn hafi glímt við and­leg veik­indi.

„Maðurinn var klæddur fangafötum og var með hvítt handklæði á höfðinu svo það sæist ekki framan í hann,“ segir fréttaritari SVT sem var á staðnum.

Móðir barnanna tveggja var einnig handtekinn en henni var svo sleppt á mánudagskvöldið síðastliðið. Hún er þó ennþá með rétt­ar­stöðu sak­born­ings í mál­inu.

• Blogga um frétt