Ætlar ekki að gefa öllum Indverjum Bitcoin

Á aðgangi forsætisráðherra Indlands á Twitter var birt tíst þess efnis að ríkisstjórnin hefði fest kaup á 500 Bitcoin-rafmyntum og ætlaði að dreifa þeim til almennings í Indlandi. Enginn fótur var fyrir þessum yfirlýsingum þar sem óprúttnir aðilar höfðu komist inn á aðgang Narendra Modis. 

Þetta er í annað sinn á skömmum tíma sem tölvuþrjótar komast inn á Twitter-aðgang forsætisráðherrans en síðast notuðu þeir hann til að hvetja fólk til að leggja inn á falskan Covid-19 viðbragðssjóð.

Væri margra milljarða fjárfesting

Ef Modi myndi láta verða af þessu þyrfti Indland að greiða ríflega þrjá milljarða króna fyrir Bitcoin-myntirnar en gangverð þeirra í dag er tæplega sex og hálf milljón íslenskra króna. 

Modi er afar vinsæll á Twitter en ríflega 70 milljónir fylgja honum á persónulega reikningnum hans. Færslan var fjarlægð skjótlega eftir að hún birtist.

BBC greinir frá því að tímastening verksins sé athyglisverð fyrir þær sakir að yfirvöld í Indlandi séu nú að undirbúa regluvæðingu rafmyntamarkaðarins sem hefur vaxið hratt síðustu misseri.

Modi er ekki sérlega hrifinn af rafmyntum og hefur sagt þær vera að spilla æskulýðnum. 

• Blogga um frétt