Skurðlæknar í Bangladess undirbúa sig í dag fyrir 10 klukkustunda langa skurðaðgerð á morgun þar sem þarlendar samvaxnar tvíburasystur verða aðskildar.
Labiba og Lamisa eru tveggja og hálfs árs gamlar, eru samvaxnar á baki, deila hrygg, hluta úr meltingarfærum og kynfærum. Þær voru aðskildar að hluta aðeins níu dögum eftir fæðingu þeirra en frekari aðgerðum var frestað vikunum á eftir vegna tilkomu kórónufaraldursins.
„Dætur mínar geta ekki setið almennilega uppréttar eða legið á eðlilegan hátt,“ segir Monufa Begum, tvítug móðir systranna.
„Það er mjög erfitt að halda þeim hljóðum, við hjónin höfum varla sofið síðan þær fæddust.
Teymi 35 lækna mun koma að aðgerðinni sem tekur 10 klukkustundir, eins og áður sagði, og hefur verið tvo mánuði í undirbúningi.
Að huga að fjölskyldunni hefur verið tekið gríðarlega á bæði fjárhagslega og tilfinningalega, segir Lal Mia, 22 ára gamall fjölskyldufaðirinn.
„Ég er mjög áhyggjufullur en á sama tíma mjög spenntur. Það væri frábært að fá að sjá dætur mínar ganga og lifa frjálsar,“ segir hann og bætir við:
„En það er líka erfitt fyrir foreldri að sjá barnið sitt á skurðarborðinu.“
Háskólasjúkrahúsið í Dhaka, höfuðborg Bangladess, mun standa straum af kostnaði við aðgerðina og læknar eru vongóðir um að hún takist vel í ljósi þess að sams konar aðgerðir heppnuðust vel árið 2017 og 2018.