Elon Musk manneskja ársins

Tímaritið Time útnefndi í dag auðkýfinginn Elon Musk, stofnanda og forstjóra Tesla, sem manneskju ársins, en Time hefur útnefnt manneskju ársins frá árinu 1927.

Hinn fimmtugi Musk, sem fæddist í Suður-Afríku, tók í ár fram úr Jeff Bezoz, stofnanda Amazon, á listanum yfir ríkasta mann í heimi. 

Í október fór markaðsvirði Tesla, sem framleiðir samnefnda rafmagnsbíla, yfir eina billjón dali og þá hefur geimferðafyrirtæki Musk, SpaceX, unnið á þessu ári með geimferðastofnun Bandaríkjanna, NASA, að ýmsum verkefnum. M.a. skutu þeir á loft eldflaug sem brotlenti á loftsteini, en tilgangur ferðarinnar var að kanna hvort það væri hægt að breyta um stefnu loftsteina í framtíðinni til að forða jarðarbúum frá stórslysi. 

Musk er einna þekktastur fyrir að vera stofnandi Tesla. AFP

„Manneskja ársins hefur áhrif, og fáir einstaklingar hafa haft meiri áhrif en @elonmusk á lífið á jörðinni, og mögulega líf utan jarðar einnig,“ sagði Edward Felsenthal, ritstjóri Time, í færslu sem hann birti á Twitter. 

Musk hefur verið mjög áberandi í bandarískri menningu á undanförnum árum. Hann hefur náð að safna 66 milljónum fylgjenda á Twitter og í maí var hann einn af gestaþáttastjórnendum grínþáttarins Saturday Night Live. 

Musk hefur talað af ástríðu um áhuga sinn á að byggja nýlendu á Mars og á næsta ári stefnir hann á að skipuleggja ferðir um sporbaug jarðar, sem er liður í áætlunum SpaceX að fljúga aftur með Bandaríkjamenn til tunglsins. 

Falcon 9 eldflaug SpaceX sést hér á skotpalli Kennedy geimferðamiðstöðvar NASA á Flórída fyrr í þessum mánuði. AFP

Hann er einnig þekktur fyrir að hafa áhrif á markaði á virði rafmynta með einni færslu á Twitter. 

Hans mestu áhrif, bæði efnahagslega og samfélagslega, eru rafbílar. Musk segir að markmið Tesla hafi ávallt að vera öðrum bílaframleiðendum fyrirmynd og hafa áhrif á þá þannig að þeir myndu einnig hefja framleiðslu á rafbílum. Markmiðið sé að hraða þeirri breytingu í átt að sjálfbærum orkugjöfum.

Geimurinn hefur einnig fangað huga og athygli Musk. „Markmið hans er að gera mannkynið að tegund sem búi á mörgum hnöttum,“ segir rithöfundurinn Jeffrey Kluger, sem skrifar fyrir Time. 

• Blogga um frétt