Erlent | mbl | 15.12.2021 | 22:54

Aldrei fleiri smit greinst í Bretlandi

Boris Johnson, forsætisráðherra Bretlands, á blaðamannafundi í London í dag. AFP

Alls greindust 78,610 kórónuveirusmit í Bretlandi í gær en það er mesti fjöldi smita sem hefur greinst á einum degi frá upphafi faraldursins, að því er segir á vef BBC.

Áður höfðu mest greinst 68.053 smit og var það þann 8. janúar en þá var útgöngubann í Bretlandi.

Neyðarástand vegna Ómíkron

Prófessor Chris Whitty, helsti heilbrigðisráðgjafi enskra stjórnvalda, varaði við því á blaðamannafundi að fleiri met munu koma til með að verða slegin á næstu vikum.

Chris Whitty, helsti heilbrigðisráðgjafi enskra stjórnvalda. AFP

Hann bætti við að fólk ætti að forgangsraða þegar kemur að því ákveða hverja maður ætlar að umgangast í aðdraganda jóla.

Sjúkrahúsinnlögnum fjölgar

Þá sagði Boris Johnson, forsætisráðherra Bretlands, það „algjörlega lífsnauðsynlegt,“ að allir fari í örvunarbólusetningu.

Hann varaði við því að á sumum svæðum væri smittíðnin að tvöfaldast á innan við tveimur dögum og bætti við: „Ég er hræddur um að við séum líka að sjá óumflýjanlega fjölgun sjúkrahúsinnlagna, um 10% á landsvísu, viku frá viku, og hækkun um næstum þriðjung í London.“

Whitty sagði að landið væri að upplifa tvo aðskilda faraldra, annan knúinn áfram af „mjög ört vaxandi“ Ómíkron-afbrigðinu og hinn af Delta afbrigðinu. „Ég er hræddur um að við verðum að vera raunsæ varðandi það að öll met verði slegin á næstu vikum þar sem smittíðnin heldur áfram að hækka,“ bætti hann við.