Fimm íslensk handrit lánuð til Noregs

Alls verða fimm íslensk handrit úr safni Árna Magnússonar lánuð frá Danmörku til Noregs. Sjö önnur sem var óskað eftir verða áfram í Danmörku.

Gísli Sigurðsson, prófessor hjá Árnastofnun í Reykjavík, segir í samtali við Fréttablaðið að Norðmenn hafi eðlilega áhuga á skjölunum og að þeir séu fullfærir um að varðveita þau svo sómi sé að.

Norska þjóðarbókhlaðan óskaði eftir ellefu handritum og skjölum sem tengjast beint sögu Norðmanna. Konungsbókhlaðan í Kaupmannahöfn veitti leyfi en stjórn Árnasafns í Danmörku synjaði bóninni. Forstjóri norska safnsins lýsti yfir miklum vonbrigðum með ákvörðunina.

Forvörður hjá Árnasafni í Kaupmannahöfn segir að ef handritin séu til sýnis í meira en þrjá mánuði láti þau á sjá. Einnig hafi beiðninni að hluta til verið synjað með tilliti til rannsókna í Kaupmannahafnarháskóla.

Ef marka má frétt Danmarks Radio má hins vegar rekja ástæðu synjunarinnar til fleiri þátta. Í þættinum Kulturen á DR er vitnað til stjórnarmanna sem segja málið varða mikilvæg grundvallaratriði sem gætu skapað fordæmi.

Að verða við beiðninni gæti leitt til þess að Íslendingar geri kröfu um handrit.

• Blogga um frétt