Erlent | AFP | 24.1.2022 | 9:35

Ísinn brotinn á fundinum í Ósló

Sendinefnd talíbana er nú stödd í Ósló í Noregi til að funda með fulltrúum vestrænna ríkja og blaðamönnum. AFP

Feminíski aðgerðasinninn Jamila Afghani segir fund talíbana, Afgana og vestrænna erindreka sem fór fram í Ósló í Noregi í gær hafa verið jákvæðan. Mannréttindi, staða kvenna og stríðið í Afganistan voru til umræðu en sendinefnd talíbana ræddi meðal annars við konur sem hafa barist fyrir réttindum kvenna í landinu og blaðamenn.

Jamila Afghani sagði áform talíbana lofa góðu. „En við þurfum að sjá hverjar aðgerðir þeirra verða, miðað við orð þeirra,“ bætti hún við.

Frétt af mbl.is

Funda með vestrænum ríkjum og blaðamönnum

Þetta er í fyrsta skipti sem sendinefnd talíbana kemur til Evrópu síðan talíbanar tóku völd í Afganistan. Gert er ráð fyrir að fundað verði í dag og á morgun en það er utanríkisráðherra talíbana, Amir Khan Muttaqi sem fer fyrir sendinefndinni.

Talsmaður talíbana, Zabihullah Mujahid skrifaði á Twitter í gær að allir Afganir þurfi að vinna saman að betri framtíð í Afganistan.

Fundirnir fóru ekki fram fyrir opnum dyrum en viðræðurnar fara fram á Soria Moria hótelinu rétt fyrir utan Ósló.

Ekkert ríki hefur viðurkennt stjórn talíbana en þeir voru síðast við völd í landinu frá árinu 1996 og til 2001 þegar Bandaríkin gerðu innrás. Í kjölfar brotthvarfs Bandaríkjahers í fyrra tóku talíbanar aftur völdin í landinu í ágúst 2021.

Aðstæður fólks í Afganistan hafa snarversnað síðan talíbanar tóku við og áætlað er að 23 milljónir búi við hungur. Það eru um 55% af heildarfjölda íbúa. Sameinuðu þjóðirnar hafa sagst þurfa 4,4 milljarða Bandaríkjadala til þess að koma til móts við þessa stöðu.

Bandaríska ríkisstjórnin hefur fryst stórar sjóði í eigu seðlabanka Afganistan og mannúðaraðstoð í formi fégreiðslna var snarlega hætt eftir að talíbanarnir tóku völd.

Afþakkaði boð um að taka þátt

Fyrrum ráðherra í ríkisstjórn Afganistan, sem var steypt af stóli í ágúst á síðasta ári, Nargis Nehan, er nú búsett í Noregi. Hún afþakkaði boð um að taka þátt í viðræðunum en hún var orkumálaráðherra.

Nehan sagði að hún hefði áhyggjur af því að viðræðurnar gerðu það að verkum að viðvera talíbana í landinu yrði samþykkt af öðrum ríkjum heims.

Tvær konur sem barist hafa fyrir réttindum kvenna hafa horfið þessa vikuna. Voru þær teknar af heimilum sínum í Kabúl eftir að hafa tekið þátt í mótmælum.

Mótmælt fyrir utan

Á annan tug manna kom saman fyrir utan utanríkisráðuneyti Noregs í gær og mótmæltu viðræðunum. Einn mótmælandanna, Shala Sultani, sagði fjölmiðlum að viðræðurnar væru blaut tuska í andlitið fyrir Afgani sem misst hafa fjölskyldu og ástvini eftir að talíbanar tóku við. „Þú talar ekki við hryðjuverkamenn,“ sagði Sultani.

Í dag munu talíbanar ræða við erindreka Bandaríkjanna, Frakklands, Bretlands, Þýskalands, Ítalíu og Evrópusambandsins. Á morgun munu þeir ræða við norsk stjórnvöld.