Erlent | mbl | 11.2.2022 | 18:41

Ný gögn: Rússar gætu gert innrás á næstu dögum

Myndefni sem rússneska varnarmálaráðuneytið gaf út í dag, frá sameiginlegri æfingu með her Hvíta-Rússlands. AFP

Bandaríkin og bandalagsríki þeirra hafa komist yfir ný gögn, sem gefa til kynna að Rússland gæti hafið innrás í Úkraínu jafnvel áður en Vetrarólympíuleikunum í Peking lýkur. Frá þessu greinir fréttastofa CNN og vísar til fjölda heimildarmanna sem kunnugir séu málavöxtum.

Antony Blinken utanríkisráðherra Bandaríkjanna segir innrás Rússa í Úkraínu geta hafist „hvenær sem er“, þar á meðal á meðan Ólympíuleikarnir standa yfir.

Á blaðamannafundi eftir samkomu fulltrúa Ástralíu, Indlands og Japan í Melbourne í dag, sagði ráðherrann að bandarísk stjórnvöld sæu enn „mjög uggvekjandi merki um stigmögnum af hálfu Rússa, þar á meðal söfnun nýs herliðs við úkraínsku landamærin“.

Frá sameiginlegri heræfingu Hvíta-Rússlands og Rússlands í dag. AFP

Á hverri stundu

Joe Biden Bandaríkjaforseti varaði ríkisborgara landsins við fyrr í dag og bað þá að yfirgefa Úkraínu hið fyrsta.

„Eins og við höfum sagt áður, þá erum við stödd í glugga þar sem innrás getur hafist á hverri stundu, og til að hafa það skýrt þá felur það einnig í sér Ólympíuleikana,“ sagði Blinken.

Áður en leikarnir í Peking hófust hafði aðstoðarutanríkisráðherrann Wendy Sherman sagt að þeir gætu haft áhrif á tímasetningu hugsanlegrar innrásar.

Frétt af mbl.is

Búast við innrás Rússa fyrir miðjan febrúar

Úkraínskur hermaður í skotgröf á fremstu víglínu í austurhluta landsins. AFP

Engin takmörk á samvinnu Rússlands og Kína

Vladimír Pútín Rússlandsforseti fór til Peking og átti þar fund með kínverska forsetanum Xi Jinping fyrir setningu leikanna. Í kjölfarið gáfu þeir út ítarlegt samkomulag þar sem leiðtogarnir lýstu því yfir að samvinna þeirra ætti sér engin takmörk.

Ólympíuleikarnir voru settir 4. febrúar og þeim lýkur sunnudaginn 20. febrúar.