Líkfundur á ísnum

Lögreglan í austurumdæmi norsku lögreglunnar rannsakar líkfund á íslögðu Gjersjøen-vatninu í Nordre Follo í Viken-fylki, suður af Ósló, á ellefta tímanum í morgun sem grunsamlegt dauðsfall.

Að sögn Ronny Samuelsen varðstjóra var líkið léttklætt miðað við árstíma og hitastig og því ekki hægt að útiloka að saknæm háttsemi hafi verið undanfari andlátsins, en það var Østlandets Blad sem fyrst greindi frá málinu.

Tæknideild lögreglu rannsakar nú vettvanginn og hefur lögregla lokað vegi við vatnið, Gamle Mossevei, að hluta en vegfarandi kom auga á líkið í morgun og tilkynnti lögreglu um það. Ekki er útilokað að öryggismyndavélar veitingastaðarins Villa Sandvigen, sem stendur við vatnið, hafi fest eitthvað á upptöku sem nýst gæti lögreglu við rannsóknina og er það nú í skoðun.

„Lögreglan hefur séð upptökurnar frá okkur, hún hefur verið hér frá því um ellefuleytið,“ segir Henrick Cilla, rekstrarstjóri staðarins, í samtali við dagblaðið VG. Kveðst hann hafa aflýst öllum bókunum dagsins og hringt í starfsfólk sitt í morgun og beðið það að halda sig heima í dag.

„Þetta er sérstök upplifun en auðvitað er hugur manns hjá manneskjunni sem lést og aðstandendum hennar,“ segir rekstrarstjórinn við VG.

Østlandets Blad

NRK

VG

• Blogga um frétt