Dýrkeyptur akstur ráðherra í bakarí

Bárður Nielsen, lögmaður Færeyja, hefur vikið Jør­gen Nicla­sen fjár­málaráðherra úr ríkisstjórn eftir að greint var frá því að Niclasen hefði verið gómaður við akstur undir áhrifum áfengis í síðustu viku.

Ekki er víst hvort Niclasen haldi þingmennsku áfram en hann er formaður Fólkaflokksins, eins þriggja stjórnarflokka.

Í færeyskum fjölmiðlum kemur fram að Niclasen hafi verið stöðvaður af lögreglu þar sem hann var á leið í bakarí að morgni, að kaupa morgunbrauðið eins og hermt er, en kvöldið áður hafði hann drukkið áfengi.

Ráðherrann sagði að það hafi verið hugsunarleysi að aka af stað í bakaríið og hann sjái eftir því.

Bárður lögmaður tekur tímabundið við embætti fjármálaráðherra á meðan Fólkaflokkurinn ræður ráðum sínum varðandi framhaldið.

• Blogga um frétt