Keyrðu á manninn þegar hann hljóp út

Gíslatökumaðurinn sem hélt sig í Apple-búðinni í Amsterdam í kvöld var handsamaður eftir að hann hljóp á eftir gísl sem slapp. Allir gíslarnir eru öruggir, að sögn hollensku lögreglunnar.

„Við getum staðfest að gíslatökumaðurinn er kominn út úr Apple-búðinni,“ greindi lögregla frá í tísti á tíunda tímanum í kvöld. Hún staðfesti á sama tíma að gíslunum væri borgið.

Frétt af mbl.is

Gíslatökumaðurinn kominn úr Apple-búðinni

Myndskeið af handtökunni

Lögreglan staðfesti síðar í röð af tístum að engin sprengiefni hefðu fundist á manninum eftir að fjarstýrt vélmenni leitaði þess.

Þar að auki sagði lögregla að hún hefði komist til gíslanna og að þeir myndu hljóta áfallahjálp.

Myndskeið sem var í dreifingu á samfélagsmiðlum í kvöld sýnir það þegar manninum var náð. Þar má sjá hvernig hann hleypur á eftir einum gíslanna.

Í sömu andrá keyrir bíll á vegum lögreglu á manninn. Engu skoti er hleypt af í myndskeiðinu og maðurinn handsamaður án þess að verr færi.

Myndskeiðið má sjá hér fyrir neðan en rétt er að nefna að það er ekki fyrir viðkvæma:

Aðgerðir stóðu yfir í um sex klukkustundir. AFP

• Blogga um frétt