Erlent | mbl | 25.2.2022 | 21:09

Aukin geislavirkni mælist og starfsmenn í gíslingu

Frá æfingu rússneska hersins í grennd við Tsjernóbyl áður en innrásin hófst. AFP

Áhyggjur fara vaxandi vegna öryggis þeirra fimmtán kjarnaofna sem til staðar eru í Úkraínu, eftir því sem allsherjar innrás rússneska hersins vindur áfram.

Sérfræðingar segja kjarnaofnana, í alls fjórum orkuverum sem dreifð eru um landið, vera búna fjölda varúðarráðstafana sem eiga að koma í veg fyrir að þeir bræði úr sér.

Samt sem áður, í þeirri stærðarinnar styrjöld sem Vladimír Pútín Rússlandsforseti hafi hrundið af stað, þá sé aukin hætta á að reyna muni á þær ráðstafanir.

Hærri gildi geislavirkni mældust í gær frá Tsjernóbyl, þar sem mesta kjarnorkuslys sögunnar átti sér stað árið 1986, en rússneskt herlið náði þar völdum eftir árás í gær.

Ströngum reglum ekki framfylgt

Það sem eftir er af kjarnakljúfi orkuversins er grafið undir steinsteypu, en verið er einnig notað til að geyma kjarnorkuúrgang.

Oksana Markarova, sendiherra Úkraínu í Washington, sagði í dag að ábyrgðin á verinu sé nú í höndum Rússlands. Benti hún á að ströngum reglum um orkuverið væri ekki framfylgt nú eftir að rússneski herinn tók það yfir.

Þá sakaði hún herliðið um að halda 92 starfsmönnum versins í gíslingu.

Úkraínsk yfirvöld telja hærri gildi geislavirkni mega rekja til umferðar rússneskra herbifreiða á jarðvegi sem enn er mengaður vegna slyssins árið 1986, samkvæmt umfjöllun Guardian.