Rússar beittu neitunarvaldi sínu í Öryggisráði Sameinuðu þjóðanna í kvöld þegar kosið var um ályktunartillögu Bandaríkjanna, um að fordæma hernaðaraðgerðir Rússa í Úkraínu og krefjast þess að herlið Rússlands verði dregið úr landinu. 

Ellefu af þeim fimmtán aðildarríkjum sem eru með fulltrúa í ráðinu kusu með tillögunni, sem var auk Bandaríkjanna lögð fram af Albaníu. 

Kína, Indland og Sameinuðu arabísku furstadæmin sátu hjá í atkvæðagreiðslunni.

Fordæmalaus fjöldi ríkja 

Rússland fer með neitunarvald í ráðinu þar sem landið er með fast sæti og var því ljóst að tillagan myndi aldrei ná fram að ganga. Fulltrúar ýmissa aðildarríkja létu í ljós óánægju sína við umræður um tillöguna;

„Við skulum hafa eitt á hreinu. Rússland, þið getið kosið gegn þessari tillögu, en þið getið ekki þaggað niður í okkur og þið getið ekki neitað sannleikanum, gildum okkar. Þið getið ekki neitað úkraínsku þjóðinni,“ sagði Linda Thomas-Greenfield, sendiherra Bandaríkjanna hjá Sameinuðu þjóðunum við umræðurnar. 

Tæplega 70 aðildarríki Sameinuðu þjóðanna studdu tillöguna. Volodymyr Zelenskí, forseti Úkraínu, þakkar aðildarríkjunum fyrir stuðninginn á Twitter. 

„Sannleikurinn er með okkur, sigurinn verður okkar,“ skrifar forsetinn og bendir á að fjöldi stuðningsríkjanna sé fordæmalaus.

Tengdar fréttir

Úkraína

Geta hvorki staðfest né neitað fyrir samskiptin

• Börn í Úkraínu fengu gjafir frá Íslandi
• Rússar og Úkraínumenn skiptast á hundruðum stríðsfanga
• Engin skemmdarverk voru unnin á sæstrengnum
• Úkraínskir hermenn teknir af lífi

» Fleiri tengdar fréttir

• Blogga um frétt