„Versnandi staða öryggismála hefur haft í för með sér aukin verkefni bandalagsríkja á Norður-Atlantshafi og á norðurslóðum, og aukið umfang starfseminnar á öryggissvæðinu í Keflavík,“ sagði Þórdís Kolbrún Reykfjörð Gylfadóttir utanríkisráðherra í umræðum um utanríkis- og alþjóðamál á Alþingi í dag.

Á vef Stjórnarráðsins kemur fram að þó skýrslan miðist við árið 2021 hafi ekki verið hjá því komist að minnast á innrás Rússlands í Úkraínu og þá víðsjárverðu tíma sem við horfum nú fram á í öryggismálum í Evrópu. 

„Eins og sést hefur glöggt að undanförnu skipar Íslands sér dyggilega í hóp með lýðræðisríkjum sem fylkja sér virðingu fyrir mannréttindum, lýðræði, jafnrétti og frelsi. Það eru þeir þræðir sem eru samofnir öllu starfi Íslands á alþjóðavettvangi. Á vettvangi alþjóðlegra stofnana á borð við Sameinuðu þjóðirnar, Öryggis- og samvinnustofnun Evrópu (ÖSE) og Evrópuráðið tala íslensk stjórnvöld skýrt fyrir þessum gildum,“ sagði ráðherra í ræðu sinni.

Sárafátækum fjölgað vegna heimsfaraldurs

Hún sagði að fyrir utan stríðsrekstur Rússa í Evrópu mætti nefna að áhrifa heimsfaraldurs kórónuveiru gætti enn mjög. Eftir að faraldurinn skall á hafi sárafátækum fjölgað í fyrsta skipti í tvo áratugi.

„Stjórnvöld í ýmsum ríkjum hafa skákað í skjóli þess að lýðræðislegt aðhald er þar lítið til þess að takmarka í nafni sóttvarna margvísleg einstaklingsbundin mannréttindi. Hið sama átti sér stað, í mismiklum mæli, um heim allan, þar á meðal í löndum þar sem virðing fyrir borgaralegum réttindum á djúpar rætur í samfélagi og þjóðarsál. Ég hef lýst áhyggjum mínum af þessari þróun og því hversu takmörkuð umræða hefur átt sér stað um skerðingu þessara réttinda,“ sagði utanríkisráðherra jafnframt.

Tengdar fréttir

Úkraína

Hótar Bretum og Bandaríkjamönnum

• Segir að Rússar séu að nota Úkraínu sem tilraunasvæði
• Skutu langdrægri eldflaug í átt að Úkraínu
• Vinaþjóðir Úkraínu kyndi undir „sálfræðihernað“ Rússa
• Fordæma ákvörðun um jarðsprengjur

» Fleiri tengdar fréttir

• Blogga um frétt