Erlent | mbl | 22.3.2022 | 14:00 | Uppfært 14:38

Úkraínumenn náð að snúa vörn í sókn

Úkraínskur skriðdreki á ferð fyrr í mánuðinum. AFP

Þrátt fyrir linnulausar loftárásir Rússa í meira en þrjár vikur er úkraínski herinn kominn í sókn á nokkrum svæðum. Þetta var haft eftir talsmanni bandaríska varnarmálaráðuneytisins í dag.

Árásir Rússa hafa lagt í rúst fjölda úkraínskra borga frá því þeir réðust inn í Úkraínu með mörg þúsund manna herlið 24. febrúar. Mannfall eykst stöðugt og meira en tíu milljónir manna hafa flúið heimili sín.

Engin lausn á stríðsátökunum virðist í sjónmáli.

John Kirby segir Rússana hörfa sums staðar. Þreyta og skortur á mat hái þeim. AFP

Sýnt ótrúlegan styrkleika

Þrátt fyrir það hefur Úkraína staðið fast gegn árásunum, með herstuðningi frá Vesturlöndum, og sýnt ótrúlegan styrkleika í þessum aðstæðum.

John Kirby, talsmaður Pentagon, sagði í samtali við CNN í dag að úkraínski herinn væri kominn úr vörn og farinn í sókn á sumum svæðum.

„Þeir eru að ráðast á Rússana og koma þeim til að hörfa, sérstaklega í Mykolaív í suðri. Við höfum séð þetta verið að aukast allra síðustu daga.“

John Kirby sagðist ekki geta staðfest þær fregnir að Úkrínumenn hefðu náð einum bæ af Rússum og hygðu á fleiri yfirtökur á næstu dögum. „Það væri þó í takt við hvernig þeir eru að berjast og þá færni sem við höfum séð úkraínska hermenn beita,“ sagði hann.

Rússar matarlausir og óskipulagðir

Kirby tók undir að rússneski herinn væri kraftminni núna en í upphafi.

„Þeir eru á síðustu metrunum. Þeir eru matarlitlir. Þeir eru ekki að skipuleggja gjörðir sínar á samræmdan máta, eins og búast mætti við af nútímaherliði,“ sagði hann og vísaði í samskiptaörðugleika milli flughers og landgönguliðs, sem væru stundum að nota farsíma til samskipta.