Rússar segjast nú ætla að einbeita sér að „algjörri frelsun“ Donbas-héraðanna sem eru í austurhluta landsins. Þetta væri annar af tveimur möguleikum sem Rússland hefði haft til skoðunar, en hinn væri að einbeita hernaði sínum að öllu landinu. Þetta kom fram í máli Ser­gei Rudskoi, hers­höfðinga í rúss­neska hern­um, á fundi sem sýndur var á ríkissjónvarpsstöð í Rússlandi.

Þessi orð geta táknað ákveðna stefnubreytingu á áformum Rússlands, en áður hefur verið talið að markmið hernaðaraðgerða þeirra sé að ná höfuðborginni Kænugarði og ná yfirráðum yfir landinu í heild. Mótstaða Úkraínumanna hefur hins vegar verið mun sterkari en búist var við.

Sagði Rudskoi að 93% af Luhansk-héraði væri undir stjórn Rússa og 54% í Donetsk-héraði. Þá staðhæfði hann að Rússum hefði tekist að eyðileggja meirihluta úkraínska lofthersins og sjóhersins og að þar með hefði Rússum tekist að ná markmiðum sínum í fyrsta hluta innrásarinnar.

Varnarmálaráðuneytið útilokaði þó ekki frekari árásir á úkraínskar borgir og varaði við því að Rússar myndu bregðast við öllum tilraunum til að loka loftrýminu yfir Úkraínu sem ráðamenn í Úkraínu hafa ítrekað óskað eftir aðstoð NATO með að framkvæma.

Samkvæmt varnarmálaráðuneytinu munu Rússar halda áfram innrás sinni þangað til markmiðum sem Vla­dimír Pútín Rúss­lands­for­seti hafði sett, en ekki var tiltekið sérstaklega hver þau markmið væru.

Tengdar fréttir

Úkraína

Skutu niður flugskeyti og dróna yfir Kænugarði

• Binda vonir við að Trump endi stríðið
• Vill aukna ábyrgð Evrópu í varnarmálum
• Blinken flýgur á fund NATO og ESB
• Kona og þrjú börn létu lífið í heimabæ Selenskís

» Fleiri tengdar fréttir

• Blogga um frétt