„Ekki spila diplómatíska leiki við fjöldamorðingja“
Setja bókamerki
„Enginn leiðtogi í hinum frjálsa heimi ætti að hika við að segja það hreint út að heimurinn væri mun betri staður ef Pútín væri ekki lengur við völd í Rússlandi. Góð aðferð til að koma því til leiðar er að segja einmitt það.“
Þetta segir Garrí Kasparov, fyrrverandi heimsmeistari í skák sem lengi hefur mótmælt setu landa síns, Vladimírs Pútíns, á valdastól í Kreml.
Vísar hann til orða Joe Biden Bandaríkjaforseta fyrr í kvöld, sem hann lét falla í lok ávarps við konunglega kastalann í höfuðborg Póllands:
„Í Guðs bænum, þessi maður getur ekki haldið áfram við völd,“ sagði forsetinn um Pútín.
Ekki viljað kalla opinberlega eftir stjórnarskiptum
Ummæli forsetans, sem þóttu söguleg og bera merki um mikla stefnubreytingu, voru þó dregin til baka aðeins skömmu eftir að hann kvaddi viðstadda í Varsjá.
Embættismaður frá Hvíta húsinu fullyrti að forsetinn hefði ekki raunverulega átt við það að Pútín væri ekki lengur vært á valdastóli.
„Meining forsetans var sú að Pútín getur ekki verið leyft að beita valdi sínu gagnvart nágrönnum sínum eða á svæðinu. Hann var ekki að tala um völd Pútíns í Rússlandi, eða stjórnarskipti.“
Stjórnvöld bæði í Bandaríkjunum og Bretlandi hafa lagt sig í líma við að gefa ekki í skyn að þau vilji annan mann í brúnni í Moskvu, jafnvel þó Biden sjálfur hafi til að mynda kallað hann stríðsglæpamann.
„Biden er ekki Trump“
Kasparov skrifar um málið á Twitter og bendir á að Pútín hafi haldið í völd í meira en tuttugu ár vegna þess að þrátt fyrir að hann hafi leitt landið til glötunar að mörgu leyti, þá sé enn komið fram við hann eins og stóra stjórann sem geti komið hlutunum aftur á réttan kjöl.
„Einræðisherrar merja niður jafnvel minnsta merki um andstöðu, svo þeir geti sagt: „Ef ekki ég, hver þá?“ Að tuttugu árum liðnum þá virkar þetta. En við verðum öll að ímynda okkur Rússland eftir Pútín, svo það geti gerst. Engin normalísering, engir samningar, ekkert. Hann er ólögmætur og hann er stríðsglæpamaður,“ skrifar skákmeistarinn.
„Biden er ekki Trump, sem þarf þýðanda frá ensku yfir í ensku! Enginn einræðisherra er lögmætur. Ekki taka eitthvað til baka þegar þú hefur rétt fyrir þér og ert í rétti. Ekki spila diplómatíska leiki við fjöldamorðingja.“
Miklar rakaskemmdir og mygla í Lögbergi
Hóflega bjartsýn á að samningar náist
Áhrif örvandi fíkniefna meginorsök banaslyss
Borgarstjóri LA virti blaðamenn að vettugi
Afleiðingar fjögurra ára vatnstjóns koma fram
Sjö fluttir á sjúkrahús