Joe Biden Bandaríkjaforseti kallaði í gær eftir því að réttað yrði yfir Vladimír Pútín Rússlandsforseta sem stríðsglæpamanni vegna morða Rússa á saklausum borgurum í Bútsja.

Sagði Biden ljóst að drápin væru stríðsglæpur, en fjölmargir þjóðarleiðtogar fordæmdu voðaverkin í gær.Volodimír Selenskí, forseti Úkraínu, sagði að heimsbyggðin myndi dæma þau sem þjóðarmorð.

Biden sagði einnig að hann myndi beita sér fyrir frekari refsiaðgerðum og viðskiptaþvingunum á hendur Rússum vegna stríðsglæpanna. Jake Sullivan þjóðaröryggisráðgjafi Bidens sagði við fjölmiðla að Bandaríkin myndu setja á frekari aðgerðir í vikunni, og að verið væri að ræða við Evrópuríkin aðgerðir sem beinist gegn orkugeiranum í Rússlandi.

Linda Thomas-Greenfield, sendiherra Bandaríkjanna hjá Sameinuðu þjóðunum, og Liz Truss utanríkisráðherra Breta sögðu í gær að vísa bæri Rússum úr mannréttindaráði Sameinuðu þjóðanna vegna ódæða Rússa í Bútsja.

Enn er ekki vitað hversu margir hafi verið myrtir í Bútsja, en Irína Venediktova, ríkissaksóknari Úkraínu, sagði í gær að minnst 410 lík hefðu fundist. 

Tengdar fréttir

Úkraína

Skutu niður flugskeyti og dróna yfir Kænugarði

• Binda vonir við að Trump endi stríðið
• Vill aukna ábyrgð Evrópu í varnarmálum
• Blinken flýgur á fund NATO og ESB
• Kona og þrjú börn létu lífið í heimabæ Selenskís

» Fleiri tengdar fréttir