Erlent | AFP | 16.4.2022 | 8:26

Loftárás á verksmiðju í Kænugarði

Verksmiðjan sem var eyðilögð í gær. AFP/Fadel Senna

Verksmiðja í Kænugarði sem framleiðir hernaðargögn varð fyrir loftárás rússneskra hersveita snemma í morgun, en Rússar hafa nýlega varað við hertum árásum á höfuðborgina.

Mikill viðbúnaður lögreglu og hermanna var á svæðinu eftir að borgarstjóri Kænugarðs Vítalí Klitsjkó tilkynnti um sprengingar í Darnirskí-hverfi borgarinnar í morgun. Yfirvöld eru enn að rannsaka hvort einhver hafi særst eða látið lífið í árásinni.

Rússneska varnarmálaráðuneytið hefur sömuleiðis staðfest árásina á verksmiðjuna en samkvæmt þeirra upplýsingum voru „mjög nákvæm og langdræg“ flugskeyti notuð til að eyðileggja hana.

Frétt af mbl.is

Rússar herða árásir á Kænugarð

Vara við árásum

Rússar hafa sakað Úkraínumenn um að miða árásum að rússneskum bæjum við landamærin og hafa þeir varað við umfangsmeiri árásum á höfuðborgina.

„Fjöldi og umfang eldflaugaárása á skotmörk í Kænugarði mun aukast til að bregðast við hryðjuverkaárásum eða skemmdarverkum sem stjórn Kænugarðs hefur framið á rússnesku yfirráðasvæði,“ sagði í yfirlýsingu ráðuneytisins í gær.

Einungis sólarhringur er liðinn frá því að rússneskar hersveitir gerðu árás á Vizae verksmiðju fyrir utan Kænugarð, í grennd við alþjóðaflugvöllinn, sem framleiddi flugskeyti sem Rússar telja að hafa verið notuð til að sökkva flaggskipinu Moskvu.