Mikil eyðilegging í Kansas

Hvirfilbylur hefur valdið mikilli eyðileggingu í Kansasríki í Bandaríkjunum. Veðurstofa Bandaríkjanna hefur gefið út viðvörun vegna bylsins sem fer nú í gegnum miðvesturríkin Iowa, Missouri, Nebraska auk Kansas. BBC greinir frá.

Borgarstjóri Wichita, Brandon Whipple, segir á bilinu 50 til 100 byggingar hafa orðið fyrir miklum skemmdum er hvirfilbylurinn fór þar um, sérstaklega í Andover úthverfinu. Ekki hefur verið tilkynnt um slys á fólki. 

Whipple hvatti fólk til að halda kyrru fyrir heima en margar götur eru lokaðar vegna eyðileggingarinnar. 

Kansasríki er á miklu hvirfilbylja belti í Bandaríkjunum og er tíðni hvirfilbylja í ríkinu há. Tíðni þeirra er hvað hæst frá miðjum apríl og fram í miðjan júní.

Á myndböndum á samfélagsmiðlum má sjá hvernig hvirfilbylurinn tætti í sig hús og sendi bíla á flug.

• Blogga um frétt